Gevaarlike offervleis van Baal / Padbeskrywing

Die hele Ps 19 gaan oor die wonderlike Woord van God en dat ons ons moet vasmaak aan die Woord en die insettinge van God.  Ons moet bly op die Weg van God, ons moenie afdraaipaadjies vat nie.  Lees gerus die onderwerp op die blog: "God se nou pad".   Ons moet in Sy voetstappe volg, ons moet Sy Weg bewaar sonder om uit te draai. (Job 23:11) Hoe weet jy jy is op die regte pad???

Daar is op ons pad baie vals profete, vals leraars, wolwe en ongediertes wat ons op 'n baie subtiele manier probeer weglok van God se pad af.  Hulle hou vir ons lekkernye of 'n lekker stuk "steak" om ons te lok na hulle pad toe, sodat ons die pad moet byster raak, weg van God af.  En moenie verbaas wees nie - moenie die vyand gaan soek wat soos 'n kinderprentjie van satan lyk nie!  Hy werk deur so baie verskillende vorms, selfs deur die vorm van soveel leraars, pastore, profete, diakens, ouderlinge….  

So hoe weet ons waar is die regte pad?  Hier is soveel paadjies uitgelê in hierdie wêreld, elke kerk het sy eie paadjie wat hy volg en wat hy sy mense laat volg.  En die mens wat nie onderskeidingsvermoe het nie, glo sy kerk is reg, want dit gaan mos oor God.  Maar wees versigtig, want oor watse god gaan dit eintlik in jou kerk? 

Hoe weet jy jy is op die regte pad? Hoe weet jy verseker dis nie die pad van Balak nie?  In Openbaring 2,3 en 4  word daar gewaarsku teen sulke kerke.  Moenie dink oordat jy kerk toe gaan, jy is reg en jou saak met God is reg nie, asb.  Jou alledaagse verhouding met God moet reg wees, jou hart en gesindheid teenoor God moet reg wees, nie jou warmgesitte sitplek in die kerk nie - want as jou sitplek warm gesit is in die kerk, is die kans goed dat jou hart lou of selfs yskoud vir God is.  Hoe voel jou sitplek in die kerk teenoor jou knieë?  Dis waar God ons wil he, op ons knieë, een tot een met Hom.  Hoe lyk jou Bybel?  Vol stof op die bedkassie of miskien in 'n boekrak?  Net reg om te gryp wanneer jy kerk toe gaan?   Openb 3:15,16:  "Ek ken jou werke, dat jy nie koud is en ook nie warm nie.  Was jy tog maar koud of warm.  Maar nou, omdat jy lou is en nie koud of warm nie, sal Ek jou uit my mond spuug."     

Sien jy God se aanwysings en rigtingborde op die pad waarop jy is?  Of is jy verdwaald in 'n woud op soek na padaanwysings?  Daar is net een regte pad en dit is die pad wat God ons leer om op te loop.  En daardie padaanwysings kry jy alleenlik by God, deur Sy Woord, nie by die kerk of enige ander plek nie.  Jy kry daardie padaanwysings alleenlik deur Manna te eet.

Ps 119 (The Message):  (1-8)  You're blessed when you stay on course, walking steadily on the road REVEALED BY GOD.  You're blessed when you follow His directions, doing your best to find Him.  That's right, you don't go off on your own;  you walk straight along the road He set.  You, God, prescribed the right way to live;  now you expect us to live it. 

…I thank You for speaking straight from your heart… 

The Message (9-16)  How can a young person live a clean life?  BY CAREFULLY READING THE MAP OF YOUR WORD!!!  I'm single-minded in pursuit of you;  don’t let me miss the road signs you've posted.  …. Be blessed God;  train me in Your ways of wise living.  I'll transfer to my lips all the counsel that comes from your mouth;  I delight far more in what You tell me about living than in gathering a pile of riches.  I ponder every morsel of wisdom from You….

Waarheen lei die pad waarop jy is?

Joh 14: 6:  " Ek is die weg en die waarheid en die lewe, niemand kom na die Vader behalwe deur My nie"  Jesus is die enigste weg, die waarheid lê IN, en by Hom.  Ons besef nou al dat Jesus is die Woord.  Wanneer ons die Woord, oftewel Manna inneem, vul die Manna ons van binne af en omdat die Woord ook Jesus is, is dit Jesus wat ons inneem.  Hy begin leef binne ons.  Ons raak een met God.  Joh 14: 20:  "In die dag sal julle weet dat Ek in my Vader is, en julle in My, en Ek in julle.  23  As iemand My liefhet, sal hy My woord bewaar, en my Vader sal hom liefhê, en Ons sal na hom toe kom en by hom woning maak."  Ons raak gevul met die Gees en die Gees begin ons leer en lei.  Elke woord in die Bybel is Geesvervuld, want dit kom uit God se mond.  So wanneer jy hierdie Geesvervulde Woord inneem, raak jy ook Geesvervuld van binne af.  Dit is die HG wat binne jou kom woon en jou leer. 

Joh 14:17:  " Gees van die waarheid wat die wêreld nie kan ontvang nie, omdat dit Hom nie sien en Hom nie ken nie;  maar julle ken Hom, omdat Hy by julle bly en in julle sal wees."  Maar om die Gees van waarheid te kan ontvang, moet ons Hom KEN.  Hoe ken ons Hom?  Deur die Woord in te neem.  Joh 14:26:  " maar die Trooster, die Helige Gees, wat die Vader in my Naam sal stuur, Hy sal julle alles leer en sal julle herinner aan alles wat Ek vir julle gese het."

As jy op die weg van waarheid en lewe is, sal jy Manna inneem en  God sal jou deur die HG lei.  Dan het jy nie nodig om deur enigiemand anders gelei te word nie.  Maak net seker jy is op die pad van God en nie verdwaald nie…     

Verlore in die woud

Kom weg van al die afdraaipaadjies wat die kerke leer en tel jou Bybel op.  Begin rigting soek in die Woord, maar die belangrikste is om vir God te soek in die Woord.   Jy SAL Hom vind (2 Kron 15:2).  Raak lief vir God deur die Woord en leer ken Sy padaanwysings.  Laat God toe om jou te begin leer deur Sy Woord.  Hy sal vir jou direk die padaanwysings gee. In Joh 14:5 vra Thomas vir Jesus:  "Here, ons weet nie waar U gaan nie, en hoe kan ons die weg ken?" 

Baie mense doen nie moeite om te soek na die regte pad in die Woord nie.  Hulle dink daar is makliker maniere, maar ek is jammer om dit so kras te stel, maar daar is geen ander manier nie.  As jou lewe draai om die wêreldse dinge en jy nie tyd maak om God te vind IN DIE WOORD nie, gaan jy probleme optel.  Jy gaan die Koningryk van God mis.  As jy God in ander materiaal buiten die Woord soek, gaan jy 'n ander god ook vind.  Dis nie die God van die Bybel nie. As jy God NET in 'n kerk gaan soek, gaan jy Hom ook nie vind nie.  Jy moet Hom binne-in jou vind.  En jy vind Hom op hierdie manier deur die Woord in te neem.  

Baie mense raak verdwaald in die lewe, want hulle soek vir God op die verkeerde plek.  Hulle soek padaanwysings en rigting en raad by die verkeerde bronne.  En dan hoor hulle soveel goed en lees soveel goed en weet later nie meer wat om te glo nie.  Hulle raak verdwaald in 'n yslike woud en hardloop van boom na boom om rigting, raad en insig te kry.  Daar is hope  verskillende padaanwysings en raadgewings teen die boombasse vasgespyker en wanneer die mens paniekerig raak, hardloop hy so vinnig hy kan om tog net die regte rigting of raad te vind.  Mens, jy soek jou raad by die verkeerde bron!  Hierdie bome is soos die afgodsbome in die ou tyd waar die mense bymekaar gekom het om Baal te aanbid.  Wil jy regtig jou raad en insig by Baal kry?  Raak net rustig en kom tot in die middel van die woud waar jy 'n lig sal sien skyn uit die hemel uit.  Hierdie lig skyn op jou antwoord.  Die Woord!  Gaan sit stil by hierdie lig en begin die Woord lees.  Al jou antwoorde en padkaarte vir die lewe is in hierdie Geesvervulde boek.  Raak eerder verdwaald in hierdie wonderbare Boek wat ons Vader vir ons gegee het as hulpmiddel deur die lewe.  Staan stil by elke gedeelte en ondersoek die Woord vir alles waarna jy soek. Dit vat toewyding en geduld van ons kant af, want die mens soek 'n antwoord nou dadelik op sy probleme, maar ek verseker jou, as jy een keer vir God so gesoek en gevind het, sal jy nooit weer op 'n ander plek raad en antwoorde soek nie.  God belowe in Sy Woord as ons Hom soek, sal Hy Hom deur ons laat vind, (2 Kron 15:2) maar soms vat dit tyd.  So wees net geduldig, God is besig om aan jou hart te werk terwyl jy Hom soek en op Hom wag…    Hy wil hê jy moet solank wegraak en verdwaald raak in Sy  Manna.  Jy sal jou pad vind soos jy die Manna inneem, want soos jy hierdie Geesvervulde woorde inneem in jou gees, raak jy al hoe meer Geesvervuld.  En soos wat jy Geesvervuld gaan begin raak,  gaan daar 'n lig op jou pad begin skyn en jy gaan duidelik begin sien waar jou pad heen lei, waar jy moet loop, waarheen die padaanwysers wys…   Ps 119:105:  "U Woord is 'n lamp vir my voet en 'n lig vir my pad" 

Verveeld met die Woord - sit om in heksery

Mense spandeer nie genoeg tyd met die Woord en God nie, hulle raak vinnig "verveeld" met die Woord of hulle verstaan nie wat hulle lees in die Woord nie, en begin dan gryp na allerhande ander goed, hulle begin hulle gees vul met ander snaakse leringe, goed wat meer interressant klink as die Woord.  Hierdie mense het dan die verkeerde padaanwysings gevolg wat hulle op 'n boom in die woud gekry het, hierdie padaanwysings kom nie uit die Bybel nie.  En as iemand met my wil verskil daaroor, is jy welkom om my te kontak.  Kry asb net eers jou Skrif uit die Bybel uit reg om dit wat ek hier sê, teen te staan.  Want dit staan nêrens in die Bybel dat ons hierdie goed moet doen nie.  Ek noem dit sommer towerwoorde!  Heksery! Duiwelswerk! Ek is jammer as ek vir die soveelste keer hieroor skryf, maar ek glo hierdie is 'n onderwerp op sy eie wat vir God baie hartseer maak.  Mense wat God se Naam misbruik om in die geestesdimensie te veg!  En dis 'n ding wat so toeneem - om in die geestesdimensie net te spreek en dit sal gebeur, om teen die bose te begin veg, om allerhande geeste te hied en gebied deur  "geheimenisse" wat blykbaar deur God aan mense geopenbaar is.  Hoe kan jy deurmekaar raak met die geestesdimensie as jy nie die Koning van die dimensie ken nie?  Hoe wil jy veg vir jou Koning as jy nie Sy hart en Sy hartsbegeertes vir jou ken nie?  Weet julle, daar is soveel mense wat glad nie eers die wapenrusting verstaan nie.  Hulle dink dit is om elke oggend op te staan en 'n vinnige gebedjie op te sê en vir God te vra om jou wapenrusting vir jou aan te trek.  Dit is glad nie waaroor die wapenrusting gaan nie.  'n Groot deel van die wapenrusting ontvang jy van God wanneer jy in die regte verhouding met God staan.

Hierdie mense glo ook dat die bloed van Jesus dit vir hulle moontlik gemaak het om in die geestesrealm te veg, dat hulle net Jesus se bloed oor hulself moet pleit en dan kan hulle gaan veg.  Dit is die grootste fout wat mense maak.  Hierdie mense wat dit doen, ken nie die Woord nie, hulle leef en teer nie op Manna nie, hulle het nog nie hulle doel op aarde gehoor van God af nie.  Want God het ons nie gestuur om die bose te kom veg nie, Jesus het dit alreeds kom doen en Hy het die bose alreeds oorwin.  Ons moet ander werk vir God doen op aarde, maar nogsteeds die vyand teëstaan.  Daarvoor het ons die wapenrusting nodig, maar ons moenie om elke hoek en draai die vyand en geeste beveg nie.

Vleis aan afgode geoffer

Daar is soveel paniekerige mense wat dadelik antwoorde op hulle probleme soek, hulle het nie die geduld om rustig by God se voete met Sy Woord te sit en te wag op God nie.  Hulle soek nou dadelik 'n antwoord of 'n oplossing.  Dit is presies waarvoor die vyand langs jou pad staan en wag.  Hy staan met 'n lekker vet stuk "steak" en maak asof hy die antwoord is op jou probleme.  Omdat jy nie geduldig op God wil en kan wag nie,  vergryp jy jou dalk aan die vleis waarmee die vyand jou lok.  Die Manna was vir jou te lig gevind, en jy het iets bietjie swaarder gesoek, en as jy dit gaan soek, gaan jy dit kry ook.   Net soos die Israeliete van ouds wat in die woestyn die manna moes eet - hulle het vinnig verveeld geraak met die smaak van die manna en het begin murmureer na meer.  Num 11:6:  "Maar nou is ons siel dor;  daar's gald niks nie:  net die manna is voor ons oë"  Hulle was nie meer tevrede met die goeie wat uit God se hand gekom het nie, hulle het God geterg hierdeur en die toorn van die Here het ontvlam (v10).  En die Here het gesê:  "Julle sal nie een dag of twee dae eet nie, of vyf dae of tien dae of twintig dae nie - 'n hele maand lank, totdat dit uit julle neus uitkom en julle daarvan walg;  omdat julle die Here wat in julle midde is , verwerp  het… " God is die Woord, die Manna.  As ons ontevrede raak met die Manna wat God ons gee, verwerp ons ook vir God.  

Daarom het God vir die Israeliete kwartels gestuur; hulle het hulle vergryp daaraan en soveel het gesterf.  V33:  "Die vleis was nog tussen hulle tande, voordat dit gekou was, toe die toorn van die Here alreeds teen die volk ontvlam het, en die Here het onder die volk 'n baie groot slagting teweeggebring."  Dieselfde gaan met jou gebeur as jy nie meer tevrede is met die Manna nie.  Manna kom uit God se mond, uit Sy hart, wat wil jy meer hê? As jy die wonderlike voedsame Manna kan eet, hoekom wil jy jou gaan vergryp aan vleis wat eintlik vir afgode geoffer is?  Hier is nou soveel interressante leesstof (wat interressanter is as die Bybel, want satan sorg dat dit ons aandag trek) op die mark en dit kom direk van die vyand af.  Wanneer jy dit eerder verorber i.p.v Manna, neem jy vleis in wat by die bome aan Baal geoffer word!  Jy gaan geestelik sterf terwyl daardie vleis nog tussen jou tande sit, soos die Israeliete.  Sulke vleis (inligting) is gewoonlik baie taai om te kou voor jy dit kan insluk.  So jy gaan kou en kou en kou aan hierdie "geheime" en tussentyd sluk jy solank al die sappe af wat die vleis in jou mond afgee.  Dit is gif!!!  Dit gaan jou gees besoedel en vergiftig.  En wanneer dit gebeur, stap HG weg uit jou hart uit.  Jy gees gaan dood van daardie gif wat die vleis afgee.  ASB bly weg van snaakse leringe af.  As jy dit nie in die Bybel kan lees nie, los dit uit.

Openb 2:14:  "Maar Ek het enkele dinge teen jou:  dat jy daar mense het wat vashou aan die leer van Bileam wat Balak geleer het om 'n struikleblok voor die kinders van Israel te werp, naamik om afgodsoffers te eet en te hoereer."  Dit is presies wat in vandag se tye gebeur.  Mense luister, en neem die leer van Balak, aan, omdat hulle nie van hulle tyd opsy wil sit om te gaan sit met die Woord van God en dit te bestudeer nie. 

Openb 2:20:  "Maar Ek het enkele dinge teen jou;  dat jy die vrou Isebel, wat haarself 'n profetes noem, toelaat om te leer en my diensknegte te VERLEI om te hoereer en afgodsoffers te eet."  Hoeveel van hierdie profete is werksaam in die kerke?  Maak seker die kerk waarheen jy gaan, word nie ook deur 'n vals profeet, oftewel Isebel, beheer nie.  Hulle gee aan die gemeente nie net vrot vleis nie, maar vleis wat goed en lekker lyk waaraan die gemeente begin kou. Alhoewel die kerke dit voorhou as Manna, dit is nie Manna nie, dit is vleis wat aan afgode geoffer word.  Hulle lok jou na 'n ander paadjie toe, na 'n afdraaipaadjie toe.  Jy gaan God se pad verloor en verdwaald raak in die woud as jy agter hulle leringe aanloop. 

Vra elke dag vir God om jou gees ontvanklik te maak vir die Manna en om jou kakebene te sluit vir die offervleis.  Vra vir God om jou onderskeidingsvermoë te gee sodat jy dadelik sal besef wie die vyand is wat jou lok met offervleis en sodat jy sal weet watter leringe van die vyand af kom.  Daar is baie leringe wat van duiwels afkom, wat ook genoem word Manna, daarom is dit so belangrik dat God jou onderskeidingsvermoë sal gee.  En die belangrikste is:  vra vir God om jou self te leer!  Hy sal!  As jy genoeg tyd insit met Sy Woord en in gebed, sal God jou self kom leer, en die regte padbeskrywing vir jou gee. 

Openb 2:17:  "Wie 'n oor het, laat hom hoor wat die Gees aan die gemeentes sê:  Aan hom wat oorwin, sal Ek gee om te eet van die verborge manna…"  Maak seker jy kry van hierdie Manna in, en nie van die offervleis nie, maak seker dit kom van God af en nie van 'n ander bron af nie.

My skapies

In die tyd wat die Here my hierdie geleer het, het een van my geliefste mak skapies, Vetgesiggie, baie siek geraak.  Ek is verskriklik lief vir my skape, elkeen het 'n naam en ek ken elkeen uit aan sy manier van mê.  Hulle is soos honde, as ek vir hulle fluit, dan kom hulle.  EK kan hulle vryf, hulle soen, doen net wat ek wil, so mak is hulle.  Maar hulle vertrou nie ander mense nie, hulle weet ek is lief vir hulle en hulle weet ek sal hulle nie seermaak nie. 

Vetgesiggie het te veel van 'n sekere kos geëet, sy was gulsig, en dit het die PH in haar maagwande erg aangetas.  Sy het soveel pyn gehad en die inflammasie het haar kloutjies aangetas dat sy nie meer kon loop nie.  Ek het alles probeer om haar gesond te kry, maar sy het te veel van die verkeerde kos  geëet.  'n Week later is sy dood.  En my hart was stukkend en aan flarde.  Ek het in my hartseer vir die Here gevra: hoekom?  Hoekom kon sy nie gesond word nie?  En die Here het my geantwoord en gesê:  "My kind, ek verstaan jou hartseer oor 'n skapie.  Jou skapie was gulsig en het meer gesoek as net die goeie weiding wat uit My hand kom.   Die gulsigheid het gemaak dat sy haar vergryp en oorvreet het aan kos wat nie van My af kom nie.  Dit was te veel, dit het haar vergiftig, die medisyne kon nie meer help nie, want die gif was te veel.  En sy is dood.  Hoeveel van My kinders verloor ek ook elke dag op so manier?  Hulle wil nie nie eet wat uit My hand kom nie - die Manna.  Hulle soek meer en lekkerder kos en vergryp hulle aan die kos wat die vyand vir hulle hou.  Dit vergiftig hulle en maak hulle gees dood vir my.  Ek gaan dood vir hulle en hulle gaan dood vir My.  Hoe moet dit nie My hart breek nie?"

Toe die Here dit vir my verduidelik, was my hart eers baie seer en ek het vir lank net gesit en snik.  Want dit is so!  Hier huil ek my oë dik oor 'n skapie, maar hoe moet die Here voel oor Sy verlore skape?  SY kinders waarvoor Hy so lief is wat verkies om hulle te vergryp aan vleis wat die vyand vir hulle aanbied, i.p.v om net Manna in te neem wat God vryelik vir ons gee? Dit is ons elkeen se eie keuse!  Gaan jy op die Weg van God bly en jou padaanwysings kry deur van God se Manna te eet?  Of gaan jy die lekker sappige stuk "steak" van die vyand op die pad  inneem en verdwaald raak in die woud om jou padaanwysings dan by Baäl te kry?