Son, maan en sterre

Ps 19:2-4:  "Die hemele vertel die eer van God, en die uitspansel verkondig die werk van Sy hande.  Die een dag stort vir die ander 'n boodskap uit, en die een nag kondig vir die nader kennis aan:  daar is geen spraak en daar is gee woorde nie - onhoorbaar is hulle stem."   

Om hierdie geskryf op te som:  ons moet wees soos die son, maan en sterre wat, sonder om 'n geluid te maak,  die glorie van God uitstraal.  Die enigste manier hoe ons dit kan doen, is om 'n lewende verhouding met God te hê en Hom lief te hê met alles binne ons, sodat SY Lig deur ons kan skyn.
Dis die enigste manier hoe ons 'n getuie kan wees van God sonder om ons stem te verhef.  Geen  "dooie" werke of om ander te probeer "red" gaan ons 'n lig laat skyn nie en geen dooie werke gaan jou 'n huis in die hemel besorg nie.  Jy moet die Lig binne jou hê.  Jy moet EEN wees met God die Vader, Jesus Christus en die HG. 

Terwyl ek bid, kyk ek in die gees na die son, maan en sterre en ek sê vir God hoe wonderbaarlik Hy is wat dit alles geskape het. 

( Psalm 19:2  Die hemele vertel die eer van God, en die uitspansel verkondig die werk van SY hande.)

Hoe kan daar mense wees wat die werk van God se hande kan raaksien, maar wat nie kan glo dat God dit gemaak het nie?  Hoe kan mens dit raaksien, maar God nie eer en dien en aanbid nie?  En die Here sê: "Want daardie mense dink hulle is verhewe bo Hom, daarom wil hulle nie die erkenning aan God gee nie".   

Jes 14:13:  "En jy het in hart gesê:  Ek wil opklim in die hemel, my troon verhef bo die sterre van God en sit op die berg van samekoms in die uithoeke van die Noorde.  14  Ek wil klim bo die hoogtes van die wolke, my gelykstel met die Allerhoogste". 

Dit is nou mense wat hulleself verhef bo God, en hulle val in verskillende kategorie:  Sommiges glo net eenvoudig nie daar is 'n God nie;  sommiges se hoogmoed en trots is so hoog in hulle harte dat hulle hulle eie god is en daar is nie plek vir die God van hemele nie (alhoewel hulle weet daar is 'n God).  Sommiges glo hulle is 'n god vir die mense, maar speel god onder hulle vervolgers onder die vaandel van God se Naam, dus, hulle misbruik God se Naam vir hulle eie eer, hulle mislei al hulle vervolgers. (2 Thess 2)     

Die Here praat oor die droogte en verduidelik dit is oor die verhewenheid van die mensdom dat hier soveel droogte is, die Here gaan nie reen gee solank hierdie mense hulleself so verhef bo Hom nie.  Die Here gaan dit nie laat reen oor mense wat nie die eer aan Hom daarvoor gaan gee nie.  Die Here wil hê daardie mense moet besef dat God die God van die hemel en die aarde is, Hy is ook God oor die reen.  Hulle moet hulle trots, arrogansie en hoogmoed los en Hom vra vir reen.  En wanneer God dan die reen stuur, sal hulle God raaksien vir wie Hy is, en die mense sal besef dit is God wat die reen gestuur het.  Dan sal hulle aan God die eer gee.

1 Kon 8:35:  As die hemel toegesluit bly, dat daar geen reen is nie, omdat hulle teen U gesondig het, maar hulle na hierdie plek toe bid en U naam bely en van hulle sonde hul bekeer, omdat U hulle verootmoedig, wil U dan hoor in die hemel en die sonde van U knegte en van U volk Israel vergewe - want U leer hulle die goeie weg waar hulle in moet wandel  - en gee reen op U land wat U aan U volk as 'n erfenis gegee het. 

Die Here gee 1 Kon 18 en dit gaan ook oor die Here wat die reen gestuur het na die droogte:  37:  "…sodat die volk kan erken dat U, Here, God is, en dat U hulle hart tot U laat terugkeer."

My hart raak skoon seer oor die mense wat dink hulle is beter as God en ek sê vir die Here ek is so jammer daaroor, ek is so jammer dat Hy alles gemaak het, maar tog erken en dien die mense Hom nie.  Hoe hartseer moet dit nie die Here maak nie.  Ek sê vir God ek vra onverskoning vir die mensdom daarvoor.  Die Here sê ja, dis hoekom Jesus kom sterf het - om onverskoning te vra vir die mense se sondes, dis hoekom Jesus se bloed moes vloei.  Ons moet SKOONGEWAS word met Jesus se bloed.  Maar nou kom satan weer en hy leer die mens iets anders oor die bloed van Jesus.  Pleks dat die mens voor God gaan staan en sy sondes bely sodat God hom kan skoonwas met die bloed, pleit hulle eerder die bloed oor hulleself!!!  Satan kom verdraai alles!  Dit is vir hulle te lekker en gemaklik om nie hulle sondes voor God te bely nie, maar net die bloed van Jesus te vat en dit oor hulle te pleit.  Dit is mos minder moeite! 

As ons nie glo aan God en Sy Seun se bloed nie, kan ons nie skoongewas word met die bloed nie.  Die bloed word deur God AANGEWEND om ons oe te was sodat ons die heerlikheid van God moet begin raaksien. Dan eers sal ons die son, maan en sterre raaksien en besef God het dit gemaak en aan God die eer gee daarvoor. 

Voordat Jesus gesterf het, was die mense baie blind en doof vir God, hulle kon nie Sy heerlikheid raaksien nie, hulle kon nie die son, maan en sterre raaksien, en God eer daarvoor nie.  Toe sterf Jesus vir God se kinders se sondes, en nou kan God Sy Seun se bloed aanwend om ons skoon te was.  Daar is 'n baie groot verskil tussen die bloed pleit en om die bloed aan te wend.  Ons mag nie die bloed pleit nie, maar ons mag in die teenwoordigheid van die Here staan sodat Hy die bloed aan ons kan aanwend om ons skoon te was, sodat die skille van ons oë af kan val soos wat met Paulus gebeur het, sodat ons die heerlikheid van die Here kan raaksien en Hom eer gee daarvoor.

Die winde van vals leringe waai om ons rond:

As mens nie jou sonde voor God bely nie, word jy nie skoongewas met Jesus se bloed nie.  Jy moet jou sondes voor God bely sodat God die bloed kan aanwend en jou skoonwas van jou sondes.  Mense wat Jesus se kosbare bloed oor hulle pleit, se sondes is nie afgewas by God nie.  Hulle sonde kleef hulle nog aan.  Nou meng die bloed wat hulle pleit met hulle sonde, dit word "filthy blood".  Dit raak taai en die vals woorde wat in die winde rondwaai, waai teen hulle vas en kleef hulle aan totdat hulle later pikswart is.  HG woon nie in mense wat swart is nie, Hy woon net in diegene wat skoongewas is met die kosbare bloed van Jesus.  Die mense glo al hierdie vals woorde wat hulle vaskleef… 

Terwyl ek bid, sê die Here Sy  skape is verlore, want hulle oë het hulle verlei en hulle het groener gras gesien. (1 Petr 2:25:  "… julle was soos dwalende skape…")  Hulle het ander, beter, groener weiding gaan soek en word dan toegesluit saam met ander skape in 'n kraal wat nie aan God behoort nie.  Sy skape is vesprei oor die hele wêreld, so baie is verlore.  Ek wonder toe of dit ons plig is om die ander skape terug te bring na hulle kraal?  En die Here se:  "Hoe gaan een skaap 'n ander skaap help?  Die Here sal hulle self terugbring na Sy kraal toe".

Die Here sê dit is nie vir ons om te loop en allerhande mense te probeer "red" nie, want Hy sal self diegene red wat gered moet word.  Mense wat ander probeer red, wil die hero wees, die Here sê Hy sal nie daardie eer aan mense gee nie.  Daarom red Hy self wie gered moet word.  Die Here sal genadig wees teenoor wie Hy genadig wil wees.  (Ex 33:19

Matt 10:5,6:  "Jesus het hierdie twaalf uitgestuur en hulle bevel gegee en gese:  Moenie gaan op pad na die heidene nie, en moenie ingaan in 'n stad van die Samaritane nie;  maar gaan liewer na die VERLORE SKAPE van die huis van Israel".  Dit bevestig dit wat die Here gesê het oor Sy skape wat verlore is.  Ek het nie verstaan nie, want die Here sê een skaap kan nie 'n ander skaap help of red nie.  Ook het die Here gesê dat Hy Sy skape sal red, ons mag nie probeer om ander te red nie.  Maar hier in Matt 10 het Jesus die 12 dissipels uitgestuur na die verlore skape…  En in Matt 28 stuur Jesus weer die mense uit na die nasies toe:
 

Matt 28:18,19:  "En Jesus het nader gekom en met hulle gespreek en gese:  Aan My is gegee alle mag in die hemel en op aarde.  Gaan dan heen, maak dissipels van al die nasies, en doop hulle in die Naam van die Vader en die Seun en die Heilige Gees;  en leer hulle om alles te onderhou wat Ek julle beveel het."
 

Ek is deurmekaar daaroor, want die Here sê duidelik ons mag nie ander probeer red nie, maar in die Skrif staan tog hoe Jesus die dissipels uitgestuur het na die verlore skape.  Ek bid weer hieroor,  en die Here sê weer HY Al RED!!!  Dis hoekom in Matt 10v19 staan: aan Jesus is die mag gegee in hemel en op aarde - Hy alleen  het die mag om Sy verlore skape te red.  Maar ons moet God se Woord verkondig aan die mense;  ons moet verkondig, ons kan nie RED nie.  Daar is 'n groot verskil tussen verkondig en red.  Dis hoekom God se Hy sal aan die mens nie daardie eer gee om iemand anders te RED nie.  Net Hy kan red, net Hy het die mag.  Maar ons moet God verkondig, ons hele lewe moet 'n getuienis wees van God, ons moet vrug dra.  Ons mag mense vertel van God en as hulle hulle lewe wil oorgee, moet ons hulle doop (v19).  Maar dis nie ons wat red nie!  Ons moet baie mooi die onderskeid sien tussen verkondig en red.

Ons moet ons lewens regkry sodat ander Jesus binne ons kan sien - sonder om 'n woord te se, moet ons Jesus verkondig aan ander.  Net soos die son, maan en sterre in Psalm 19:3: "Die een dag stort vir die ander 'n boodskap uit, en die een nag kondig vir die ander kennis aan" daar is geen spraak en daar is geen woorde nie - onhoorbaar is hulle stem." Jy hoor nie 'n geluid uit die son, maan en sterre uit nie, maar deur die lig wat uit hul uitskyn, verkondig hulle wie God is.  Dit is presies hoe ons moet wees!  Sonder om 'n ophef te maak, sonder om te bulder, moet ons lewens Jesus verkondig.  Net soos die lig uit die son, maan en sterre uitskyn, moet God se lig uit ons uitskyn.  Ons moenie  ander probeer oorreed met woorde dat ons God se kinders is nie, ons lewens moet dit wys, die Lig wat uit ons straal, moet dit wys.  Op hierdie manier verkondig ons God en moet ons lewens 'n getuienis wees van God se bestaan en liefde.   

HUISE IN DIE HEMEL

Die Here wys my die goue strate in die hemel, dis die goudste klein plaveiblokkies en oral waar die blokkies aanmekaar geheg word, skyn die goud van onder af deur.  Dit is mooier as mooi.  Dan draai ek na links en sien 'n huis, dis 'n baie groot spierwit huis, met 'n goue naambord teen die wit deur.  My hart breek net daar en ek sê vir die Here geen mens verdien so 'n huis in die hemel nie,ons is almal sondige mense.  Die Here kan maar vir my 'n grasdakhuisie ook gee in die hemel, solank ek net by Hom kan wees.  

Almal se huise is reeds klaar gebou, almal se name is alreeds op hulle deure.  Diegene wat die Here regtig uit hul harte liefhet, se huise is klaar in die hemel.  Die Here sal elkeen van daardie kinders van Hom self red!  Op Sy tyd.  Op die regte tyd.  Maar elkeen wie se huisie in die hemel reg is, SAL gered word deur God.
 

Daar is baie mense wat dink hulle werke vir God gaan vir hulle 'n huis in die hemel beteken.  Maar dit is nie so nie.  Daar is diegene wat mense vir God probeer red, maar hulle doen dit met 'n geheime agenda:   sommiges doen dit met die idee in die agterkop oor hulle verdienste in die hemel;  ander doen dit om eer van mense te kry, hulle gee nie die eer aan God nie (natuurlik maak en sê hulle dat hulle die eer aan God gee, maar dit is alles leë woorde). 

Die Here ken elkeen se hart, as jy met 'n opregte hart die Here dien uit die diepste van jou hart en Hom liefhet met jou hele hart, verstand en siel, gaan jy al klaar met jou lewenswyse 'n getuienis vir God wees.  Jy het nie nodig om jou stem dik te maak en toesprake te hou nie, jy het nie nodig om in 'n kerkbank te gaan sit en 'n leraar te volg nie.  Jy het nie nodig om dooie werke "vir God" te doen soos pannekoek by 'n basaar bak nie.  Dit is alles nuttelose werke!  Dit is godsdiens en godsdiens gaan jou nie 'n huis in die hemel besorg nie.  Die Here soek jou hart!  Hy wil 'n lewende verhouding met jou hê, Hy wil jou tyd hê, Hy wil jou gedagtes regdeur die dag hê.  Alles wat jy doen, moet jy doen tot die eer van God en nie tot eer van jouself nie.  Mense wat uit hul pad gaan om werke vir die "Here" te doen - hoeveel van daardie werke doen jy eintlik om die eer vir jouself te vat? Sodat mense jou kan raaksien en dink jy is 'n goeie kind van God, want jy doen so baie vir God…  Eintlik doen jy dit vir jou eie naam en nie vir die Naam van God nie.   Dit is hoekom die Here sê Hy het nie 'n mens nodig om Sy werk te doen nie, Hy red self diegene wat gered moet word.  Maar ons lewe moet getuig van God.  Jou lewe gaan nie getuig van God deur heeldag rond te hardloop en dooie werke vir Hom te doen nie.  Jou lewe gaan getuig van God wanneer jy tyd saam met Hom deurbring en Hom leer ken. Dit is die enigeste manier hoe Sy Lig deur jou gaan begin skyn. Dan gaan Sy lig deur jou begin skyn en die Lig binne jou gaan getuig van God.  Dit is hoe jy 'n getuie van God kan wees.  Dit is hoe ons God moet verkondig - nie deur 'n harde stem en dooie werke nie.

As jou hart opreg is en jy opreg lief is vir God met alles binne jou, gaan jou hele lewe outomaties om God draai.  Jy gaan outomaties God se Woord verkondig, jy gaan net oor Hom wil praat.  Jy gaan dit nie hoef te beplan  om SY Woord te verkondig nie, want soos die Lig uit jou skyn, gaan dit vanself getuig van God.   
 

Ps 101:7:  "Hy wat bedrog pleeg, mag binne-in my huis nie bly nie…"  As jy allerhande dooie werke doen net sodat jy eendag 'n groot kroon kan beerf of 'n huis in die hemel kan kry eendag, maak jy 'n groot fout. 

Matt 7:22:  "Baie sal in daardie dag vir My se:  "Here, Here, het ons nie in U Naam geprofeteer en in U Naam duiwels uigedrywe en in U Naam baie kragte gedoen nie?  23  En dan sal Ek aan hulle sê:  Ek het julle nooit geken nie.  Gaan weg van My, julle wat die ongeregtigheid werk" 
 

Ek dink hierdie is van die gevaarlikste dooie werke.  Mense wat ander probeer red deur in die Naam van die Here dinge te doen, wat duiwels uitdryf in die Naam van die Here, maaaaar……. Dit is alles vals!  Hulle harte is nie by God nie, so hulle doen hierdie dinge net onder die Naam van die Here,  hulle gebruik en misbruik God se Naam.  Hulle doen dit sodat mense hulle moet eer.  Dit is verskriklik hartseer. Hierdie mense wandel in die wee van satan en nie in die wee van God nie. 

'n Rukkie terug het die Here gewys dat ons steentjies in ons hemelse krone werf deurdat ons opstaan vir God se Naam; dit is nie deur "werk vir God" wat ons steentjies in ons kroon verkry nie.  Die steentjies in ons krone kry ons wanneer ons bv. opstaan vir God se Naam, wanneer ons iemand anders vermaan vir die Naam van God, tot eer van God, dan verwerf ons 'n steentjie.  Mense gaan jou haat as jy sulke goed doen, bv om iemand te vermaan, mense hou nie daarvan nie.  Maar as jy "werk" doen vir die Here wat maak dat mense net nog meer van jou gaan hou, is dit nie werk vir die Here nie, maar werk vir jouself, vir jou eie eer op aarde.  Ons moenie twisgierig raak nie, maar ons met liefde mekaar vermaan en die waarheid praat.  

Psalm 24

3  Wie mag klim op die berg van die Here?  En wie mag staan in Sy heilige plek?  4  Hy wat rein van hande en suiwer van hart is, wat sy siel nie ophef tot nietigheid en nie vals sweer nie.  5  Hy sal seen wegdra van die Here en geregtigheid van die God van sy heil.  6  Dit is die geslag van hulle wat na Hom vra, wat u aangesig soek…

Psalm 101

2  …Ek wil ag gee op die regskape wandel … EK wandel in die opregtheid van my hart, binne-in my huis.

6  My oe sal wees op die getroues in die land, dat hulle by my kan woon;  hy wat wandel in die weg van opregtheid, die mag my dien.  7  Hy wat bedrog pleeg, mag binne-in my huis nie bly nie;  wie leuens praat, kan voor my oe nie bestaan nie.

1 Kon 8:23:  "Here. God van Israel, daar is bo in die hemel of onder op die aarde geen God soos U nie, wat die verbond en die goedertierendheid hou vir U knegte wat voor U aangesig wandel met hulle hele hart."